Plantun de Prouvènço

Pèr coumpara dos planto d'encò nostre

Heteranthera reniformis & Plumbago europaea

Heteranthera reniformis

Pontederiaceae

Nom en français : Hétéranthère réniforme.

Descripcioun :
Aquesto planto fourestiero trachis dins li risiero de Camargo mounte flouris l'estiéu. Nous vèn d'Americo troupicalo, e es au nostre, en Camargo, despièi 1989. Se recounèis à si fueio redouno e si flour blanco que duron gaire de tèms dins la journado. A de guèno membranouso (fotò). Se vèi en ribo de risiero o dins li passage de rodo.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : alterno
Tipe bioulougico : Idroufite
Cicle bioulougico : Planto renadivo

Gènre : Heteranthera
Famiho : Pontederiaceae

Ordre : Commelinales

Coulour de la flour : Blanco
Petalo : irreguliero
Ø (o loungour) enflourejado : 2,5 à 3 cm
Flourido : Estiéu

Sòu : Na Cl
Autour basso e auto : 0
Aparado : Noun
Remarco : Planto envahissènto
Avoust à setèmbre

Liò : Risiero
Estànci : Mesoumediterran
Couroulougi : Óurigino Americo troupicalo
Ref. sc. : Heteranthera reniformis Ruiz & Pav., 1798

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.